Bakı. Trend:
Azərbaycanın milli bayramı olan 15 İyun Milli Qurtuluş Günü Ulu
Öndər Heydər Əliyevin siyasi hakimiyyətə qayıdışı ilə bağlıdır.
1993-cü ilin iyun ayında Azərbaycan ağır ictimai-siyasi və iqtisadi
böhranla üzləşmişdi. Ölkə daxilində separatizm, anarxiya və
dövlətin süqutuna səbəb ola biləcək vəziyyət hökm sürürdü. Bu
dövrdə Azərbaycan xalqı Heydər Əliyevin yenidən siyasi hakimiyyətə
gəlməsini tələb edirdi.
Bunu Trend-ə açıqlamasında Milli Məclisin deputatı Sevil
Mikayılova deyib.
S.Mikayılova bildirib ki, Heydər Əliyev Sovet İttifaqı Kommunist
Partiyası Mərkəzi Komitəsi Siyasi Bürosundan 1987-ci ildə istefa
verdikdən sonra Azərbaycanın siyasi arenasında ciddi dəyişikliklər
başladı:
“Onun hakimiyyətdən getməsi ilə keçmiş Dağlıq Qarabağ Muxtar
Vilayətində erməni millətçilərinin fəaliyyətləri artdı və
Azərbaycan xalqının faciələri başladı. AXC-Müsavat hakimiyyətinin
səriştəsizliyi ölkəni iqtisadi və siyasi xaosa sürüklədi, bu da
separatçılıq və vətəndaş müharibəsi təhlükəsini artırdı.
1993-cü ilin iyununda Heydər Əliyev xalqın təkidli çağırışlarına
cavab verərək, Bakıya qayıtdı və qısa müddət ərzində Azərbaycan
Respublikası Ali Sovetinin sədri seçildi. Heydər Əliyev öz
xilaskarlıq missiyasını yerinə yetirərək, ölkəni böhrandan
çıxarmağa başladı. Onun liderliyi altında Azərbaycan siyasi
stabillik əldə etdi, iqtisadi islahatlar həyata keçirildi və
dövlətin mövcudluğu qorundu.
15 iyun 1993-cü ildə Heydər Əliyevin hakimiyyətə qayıdışı ilə
Azərbaycan Respublikası dərin ictimai-siyasi və iqtisadi böhrandan
xilas oldu. Bu tarix Azərbaycan xalqı üçün qurtuluşun və yeni bir
dövrün başlanğıcını simvolizə edir. Milli Qurtuluş Günü, Azərbaycan
tarixində dönüş nöqtəsi olub və 1997-ci ildə rəsmi olaraq bayram
elan edilib”.
Deputat əlavə edib ki, Heydər Əliyevin xidmətləri və liderliyi,
Azərbaycan xalqı və dövlətinin gələcək inkişafının əsaslarını
qoydu.
“Onun qurduğu siyasi kurs Prezident İlham Əliyev tərəfindən
uğurla davam etdirilir. Bu siyasət nəticəsində Azərbaycanın
beynəlxalq aləmdə nüfuzu artıb və müstəqil siyasət həyata keçirən
güclü bir dövlətə çevrilib. Vətən müharibəsində qazanılan zəfər də
bu siyasi kursun məntiqi nəticəsidir.
Heydər Əliyevin siyasi irsi və milli qurtuluş missiyası
Azərbaycan xalqı tərəfindən həmişə uca tutulur və hər il 15 İyun
Milli Qurtuluş Günü kimi qeyd olunur. Bu gün ölkənin müasir və
müstəqil dövlət kimi mövcudluğunu və inkişafını simvolizə
edir”.
S.Mikayılova vurğulayıb ki, Prezident İlham Əliyevin rəhbərliyi
ilə Azərbaycanın inkişafı davam edir:
“Xüsusilə işğaldan azad edilmiş ərazilərdə aparılan bərpa
işləri, Azərbaycanın inkişafında yeni mərhələni nümayiş etdirir.
Milli Qurtuluş Günü xalqımızın birliyinin və dövlətimizin gücünün
simvolu olaraq əbədi qalacaq.
Azərbaycan xalqı və dövləti üçün böyük əhəmiyyət kəsb edən bu
gün həm də ölkəmizin gələcək nəsillərinə əzmlə mübarizə aparmaq və
milli birliyimizi qorumaq üçün bir nümunədir. Ulu Öndər Heydər
Əliyevin əziz xatirəsi və onun qurduğu dövlətçilik irsi Azərbaycan
xalqının milli yaddaşında əbədi olaraq yaşayacaq”.
