Şuşa. Trend:
Şuşada Heydər Əliyev Fondunun və Azərbaycan Mədəniyyət
Nazirliyinin təşkilatçılığı ilə mayın 11-dən 13-dək keçirilən VII
Beynəlxalq “Xarıbülbül” Musiqi Festivalı çərçivəsində Türkiyənin
dünya şöhrətli “Anadolu Atəşi” ansamblının çıxışı olub.
Trend-in müxbiri hadisə yerindən məlumat verir
ki, qonaqlara dünya xalqlarının ritmləri ilə nəfəslərini kəsən
unikal konsert proqramı təqdim olunub. Ansambl 120 rəqqasdan,
həmçinin xoreoqraflardan və texniki heyətdən ibarətdir. Bir rəqs
digəri ilə əvəz olundu – onlar cüt-cüt, sonra bütöv bir qrup, sonra
solo çıxış etdilər. Bu hərəkətlərin sürətlə etməsi bütün
tamaşaçıları heyran edirdi. Məlum olduğu kimi, bu qrup dünyanın ən
sürətli rəqslərini ifa edən Qinnesin Rekordlar Kitabına iki dəfə
düşüb. Rəqqaslar hər bir rəqsi ürəklə ifa edib, hər bir hərəkətini
xüsusi əhval-ruhiyyə və enerji ilə rəngləndiriblər.
Festivalın qonaqları öz təəssüratlarını Trend ilə
bölüşüblər.
Xalq artisti, Şuşa şəhərindən olan Firəngiz Mütəllimova: “Uzun
illərin işğalından sonra azad edilmiş, ötən illərdə yenidən canlan
və yenidən dirçələn doğma torpağında olmaq inanılmaz hissdir! Artıq
dördüncü dəfədir ki, festivalda iştirak edirəm və hər dəfə bu mənim
üçün unudulmaz bayramdır, ən parlaq hisslər və emosiyalar
yaşayıram, özümü azad və xoşbəxt hiss edirəm, ruhum baş verən
dəyişikliklərə sevinir. Proqram hər il müxtəlif ölkələrin incəsənət
ustalarının iştirakı ilə yaddaqalan və müxtəlif parlaq tədbirlərlə
seçilir, geniş musiqi irsi təqdim olunur. Burada hətta illərlə
cavanlaşırsınız, evinizin aurası, təbiəti və havası çox
gözəldir”.
Əməkdar mədəniyyət işçisi, Dövlət Akademik Rus Dram Teatrının
direktor müavini İlham Məmmədov: “Şuşaya ilk dəfə gəlirəm və özümü
çox xoşbəxt hiss edirəm. Festival təkcə təqdim olunan
kompozisiyaların rəngi və geniş proqramı ilə seçilmir, həm də çox
mühüm beynəlxalq əhəmiyyətə malikdir, mədəniyyətlərarası dialoqu və
humanizm, sülh, yaradıcılıq, multikulturalizm və tolerantlıq
ideyalarının təbliğini təşviq edir, xalqları bir araya gətirir. Bu
gözəl bayram artıq mədəniyyətimizin və ümumbəşəri dəyərlərimizin
salnaməsinə həkk olunub”.
Azərbaycan Mətbuat Şurasının sədri, əməkdar jurnalist, yazıçı
Rəşad Məcid: “Artıq dördüncü dəfədir ki, festivalda iştirak edirəm
və hər dəfə ən parlaq emosiyalar və təəssüratlarla yadda qalır. İlk
iştirak xüsusilə təsirli oldu – 2021-ci il mayın 12-də Şuşa
şəhərinin uzun illər işğalından sonra biz bu qədim yer torpağına
gələrək gözəl bayram keçirdik. Dünyanın çox şəhərlərində olmuşam,
amma Şuşa misilsizdir! Heydər Əliyev Fondunun görkəmli mədəniyyət,
elm ustadlarını, yaradıcı ziyalıları və gəncləri, xarici qonaqları
bir araya topladığı möhtəşəm layihə olan “Xarıbülbül” festivalı
həmişə yüksək zövqü və dərin fəlsəfəsi ilə seçilir. Budəfəki
festival 32 ildən sonra Şuşaya qayıdan ilk sakinlərə mənzillərin
açarlarının təhvil verildiyi bir məqama təsadüf etdi. Onların
arasında tanınmış dirijorumuz, Əməkdar Artist Fuad İbrahimovun
anası da var idi. Biz sevinirik ki, insanlar öz evlərinə
qayıdırlar, Qarabağ dirçəlir”.
Xalq artisti, aktyor Şamil Süleymanlı: “Şuşada olmaq mənim üçün
ən qiymətli günlərdir, köküm bu mübarək torpaqdandır, buraya daim
nənə və baba baş çəkirdim. Üstəlik, bu gün, mayın 11-də ad günümü
burada qeyd edirəm! Bundan gözəl nə ola bilər? Şuşa işğal olunanda,
uzun illər doğma yurduma gedə bilməyəndə bura qayıtmaq, məsciddə
namaz qılmaq arzusum var idi. Hətta Məkkə və Mədinədə Həcc ziyarəti
zamanı bu barədə dua edirdim. Və bu arzu Yuxarı Gövhər ağa
məscidində gerçəkləşdi! Bu gözəl günlərə görə Azərbaycan Prezidenti
İlham Əliyevə və igid ordumuza təşəkkür edirəm. Şəhidlərin
xatirəsini rəhmətlə anıram. Biz hamımız Prezidentin əsgərləriyik və
hər zaman Vətənin müdafiəsinə hazırıq. Yadımdadır, mən işğaldan
azad edilmiş Şuşaya ilk dəfə gələndə sevinc və eyni zamanda
qəzəbdən göz yaşlarımı saxlaya bilmədim ki, hər şey erməni
işğalçıları tərəfindən dağıdılıb. İndi isə hər şeyin necə bərpa
olunduğunu görəndə Şuşa daha da gözəlləşir və mənim xoşbəxtliyimin
həddi-hüdudu yoxdur!”
Festival üç gün ərzində Şuşa və Laçında keçirilir. Şuşa şəhəri
2024-cü il üçün “İslam dünyasının mədəniyyət paytaxtı” elan edilib.
Azərbaycan Respublikasının Prezidenti İlham Əliyev ötən ilin
noyabrında bununla bağlı tədbirlər haqqında sərəncam imzalayıb.
“Xarıbülbül” festivalı tanınmış incəsənət ustaları və gənc
istedadların, musiqiçi və vokalçıların, muğam, klassik və xalq
musiqisi ifaçılarının, xoreoqrafiya kollektivlərinin iştirakı ilə
keçirilir. İştirakçılar arasında Azərbaycan, Birləşmiş Ərəb
Əmirlikləri, İndoneziya, İran, Qazaxıstan, Qətər, Qvineya, Mərakeş,
Özbəkistan, Türkiyə ilə yanaşı İSESCO-ya üzv ölkələrin ifaçıları və
yaradıcı qrupları da var.
Qeyd edək ki, Şuşa şəhərinin simvolu olan gülün şərəfinə
adlandırılan “Xarıbülbül” musiqi festivalı 1989-cu ildən etibarən
keçirilir. Festival məşhur xanəndə, pedaqoq, xalq artisti Seyid
Şuşinskinin 100 illik yubileyi ilə əlaqədar 1989-cu ildə həmin ilin
may ayında Ağdamın Abdal Gülablı kəndində keçirilib, Şuşada davam
edib və Ağdamda konsertlə yekunlaşıb.
1990-cı ildən “Xarıbülbül” festivalı beynəlxalq status qazanıb.
Qarabağ münaqişəsi dövründə festivalın əsas konsertləri Ağdamda
keçirilib. Festivalın bəzi konsertləri Bərdə və Ağcabədidə baş
tutub. Ölkəmizin tarixi qələbəsi ilə başa çatan 44 günlük müharibə
zamanı Azərbaycan torpaqları işğaldan azad edildikdən sonra
festival yenidən Şuşada keçirilir. Bu il isə festivalın məkanı
genişlənədiriləcək və Laçın şəhərini də əhatə edəcək.
