Azərbaycanın 2020-ci il Vətən müharibəsində qazandığı Şanlı Zəfər, xalqımızın böyük qəhrəmanlığının və dövlətin strateji qüdrətinin ən parlaq səhifəsidir. Prezidentimiz cənab İlham Əliyevin AMEA-dakı çıxışında Zəfərin tarixi, hərbi və elmi əsaslarını təhlil etməsi, bir tarix müəllimi kimi mənim üçün bu Qələbənin dərslərini gənc nəslə çatdırmaq missiyasını daha da vacib etdi. Cənab Prezidentin qürurla qeyd etdiyi kimi, “Bizim qədər parlaq, tam və mütləq Qələbə qazanan ikinci ölkə olmamışdır”. Bu, bizim tarixi yaddaşımızda əbədi yaşayacaq bir nailiyyətdir.
Bu Qələbənin əldə olunması, Prezidentin də dəqiq təhlil etdiyi kimi, beynəlxalq hüququn və təşkilatların iflic olduğu bir dövrdə baş verdi. BMT Təhlükəsizlik Şurasının 4 qətnaməsinin 30 il ərzində icra edilməməsi, Azərbaycana öz gücünə arxalanmaqdan başqa yol qoymadı. Güc amili dünyada aparıcı qüvvəyə çevrilib və biz bu reallığı nəzərə alaraq güclü iqtisadiyyatımız sayəsində güclü hərbi potensial yaratmağa nail olduq.
Qələbənin ən həlledici dərsi isə texnoloji üstünlükdə gizlənir. Prezidentimizin vurğuladığı kimi, Vətən müharibəsi dünyanın hərbi məktəblərində tədqiq edilir. Pilotsuz uçuş aparatlarının (PUA) hərbi əməliyyatlarda kütləvi və effektiv tətbiqi, müharibənin yeni səhifəsini açdı. Azərbaycan həm ən müasir PUA-ları tədarük etdi, həm də onların bir çox növünün ölkədə istehsalına başladı. Bu, elm və hərbi sənayenin birliyinin ən gözəl nəticəsidir.
Bu gün hərbi sənayemiz sürətlə inkişaf edir. Prezidentin göstərişi ilə böyük dövlət vəsaitləri bu sahəyə ayrılır, yerli özəl sektor aktiv şəkildə istehsala cəlb olunur. Biz öz daxili tələbatımızı ödəməklə yanaşı, artıq bir çox ölkələrə hərbi təyinatlı məhsul ixrac edirik. Bu, alimlərin, mühəndislərin və dövlətin birgə fəaliyyətinin göstəricisidir.
Bu hərbi-sənaye tərəqqisinin təməli Ulu Öndər Heydər Əliyevin dövlət quruculuğu siyasətində, xüsusilə də milli ordunun formalaşmasına və elmi kadrların hazırlanmasına verdiyi misilsiz dəstəkdə köklənir. Onun yaratdığı intellektual zəmin Prezident İlham Əliyevin rəhbərliyi ilə müasir hərbi texnologiyalarla zənginləşdirilərək Qələbəyə gətirib çıxardı.
Hərbi qüdrətimiz yalnız maddi-texniki deyil, həm də mənəvi gücdən qaynaqlanır. Azərbaycanın Birinci vitse-prezidenti Mehriban xanım Əliyevanın Heydər Əliyev Fondu vasitəsilə şəhid ailələrinə, qazilərə və veteranlara göstərdiyi hərtərəfli diqqət və qayğı, onların sosial rifahının yüksəldilməsi, cəmiyyətdə qəhrəmanlıq ruhunu və orduya olan mənəvi dəstəyi gücləndirir. Bu, Qələbəmizin əbədi yaşamasını təmin edən mənəvi sütundur.
Biz bu güc sayəsində bütün Qarabağ və Şərqi Zəngəzurda böyük quruculuq işləri aparır, bərpaolunan enerji layihələrini həyata keçirir, zəngin geoloji resurslarımızı üzə çıxarırıq. Azərbaycan alimlərinin hərbi sənayeyə və texnoloji inkişafa fəal cəlb edilməsi, Qələbənin dayanıqlı olmasının yeganə təminatıdır.
Suraxanı rayonu, 118 nömrəli tam orta məktəbin direktoru Nizaməddin Ağcayev
