Bakı. Trend:
Duman və yolun buz bağlaması səbəbindən Qobustan ərazisində,
Muğanlı-İsmayıllı yolunda, Mərəzədə avtomobillər yolda
qalıblar.
İsmayıllı-Muğanlı yolunda isə bir neçə avtomobilin iştirakı ilə
qəza baş verib.
Yoldakı buzun təmizlənməsi üçün hansı işlər görülür?
Məsələ ilə bağlı Azərbaycan Avtomobil Yolları Dövlət
Agentliyinin İctimaiyyətlə əlaqələr şöbəsinin rəisi Anar Nəcəfli
Trend-ə bildirib ki, dünən də magistral yol
boyunca və kəndlərə gedən yol boyunca buzlaşma qeydə alınıb.
“Bu gün səhər saatlarında eyni hal qeydə alınıb. Çox güman ki,
axşama doğru da yolda buzlaşma olacaq. Agentliyin texnikaları yolda
növbə çəkirlər. Nəsə olarsa, müdaxilə edirlər. Yola duz və qum
səpilir. Sürücülərimiz də həmin yollardan istifadə edərkən diqqətli
olsunlar”,- deyə o qeyd edib.
