Azərbaycan ilə Pakistan arasında ədliyyə və məhkəmə sahələrində əməkdaşlığın genişləndirilməsi və təcrübə mübadiləsinin təşviqi müzakirə olunub. Bu barədə məlumat ədliyyə nazirinin Pakistan İslam Respublikasının Federal Konstitusiya Məhkəməsinin sədrilə görüşü zamanı verilib.
Görüşdə iki ölkə arasında dostluq və qardaşlıq münasibətlərinin tarixi, mədəni və dini bağlara əsaslandığı qeyd edilib; həmçinin qarşılıqlı səfərlərin tərəfdaşlığın inkişafında rolu vurğulanıb.
Tərəflər Anlaşma Memorandumu və Əməkdaşlıq Proqramı çərçivəsində həyata keçirilən tədbirləri müzakirə ediblər. Bildirilib ki, hakimlər və ədliyyə işçiləri üçün indiyədək biri İslamabadda, digəri Bakıda olmaqla iki təlim keçirilib.
Qeyd olunub ki, növbəti təlimin noyabr ayında İslamabadda keçirilməsi nəzərdə tutulur və birgə təlimlərin əlaqələrin möhkəmlənməsinə xidmət edəcəyi bildirilir.
Mənbə: az.trend.az