Trend-in məlumatına görə, Azərbaycan və Ermənistan dövlət sərhədinin delimitasiyası Azərbaycan, Ermənistan və Gürcüstan sərhədlərinin kəsişdiyi nöqtədən başlayaraq şimaldan cənuba doğru aparılması barədə razılıq əldə olunub. Bu barədə Azərbaycanın xarici işlər naziri Ceyhun Bayramov “2026 Bakı İqlim Fəaliyyəti Həftəsi” çərçivəsində jurnalistlərə bildirib.
Nazir qeyd edib ki, delimitasiya üzrə dövlət komissiyasında Azərbaycan tərəfinin tərkibi dəyişməyib və komissiyaya Baş nazirin müavini Şahin Mustafayev rəhbərlik edir. O, həmçinin bildirib ki, Ermənistanda da müvafiq komissiyaya Baş nazirin müavini rəhbərlik edir.
Bayramovun sözlərinə görə, ötən dövrdə iki ölkənin komissiyaları arasında çoxsaylı görüşlər keçirilib və komissiyaların fəaliyyətini tənzimləyən sənədlər həm Azərbaycanda, həm də Ermənistanda qəbul olunub.
Nazir əlavə edib ki, delimitasiya işlərinin daha çətin hesab olunan şimal seqmentindən başlanılması və işin şimaldan cənuba doğru irəliləməsi barədə razılıq və qarşılıqlı anlaşma mövcuddur. Daha spesifik məsələlər, o cümlədən müəyyən yaşayış məntəqələri ilə bağlı məsələlər delimitasiya komissiyalarının işinin gedişində müzakirə olunacaq və həll olunması gözlənilir.
Mənbə: az.trend.az