Kamboca Krallığının Baş naziri Hun Manet oktyabrın 13-də Azərbaycan Respublikasına rəsmi səfəri çərçivəsində Müdafiə Sənayesi Nazirliyinin tabeliyində fəaliyyət göstərən müəssisələri ziyarət edib.
Ziyarət zamanı Hun Manetə müəssisələrin iş prinsipləri, istehsal imkanları və texnoloji potensialı barədə məlumat verilib. Ona aparılan modernləşmə işləri, istehsal proseslərinin müasir standartlara uyğun təkmilləşdirilməsi, yeni texnoloji avadanlıqların tətbiqi və mövcud infrastrukturun yenilənməsi barədə də məlumat təqdim olunub.
Məlumatda yerli istehsal imkanlarının genişləndirilməsi, innovativ texnologiyaların tətbiqi, elmi‑tədqiqat fəaliyyətinin gücləndirilməsi və yüksək ixtisaslı kadr potensialının formalaşdırılmasının müdafiə sənayesinin əsas inkişaf istiqamətləri olduğu qeyd edilib.
Ziyarətdə müdafiə sənayesi nazirinin müavinləri Mehman Baxışov və Hidayət Əzimov iştirak edib və Hun Manetə ölkədə son illər bu sahədə əldə olunan nailiyyətlər barədə məlumat verilib.
Səfər çərçivəsində müdafiə sənayesinin inkişaf perspektivləri və beynəlxalq əməkdaşlıq imkanları ətrafında fikir mübadiləsi aparılıb; rəsmi şəxslər belə səfərlərin əlaqələrin genişləndirilməsi və yeni tərəfdaşlıq imkanlarının dəyərləndirilməsi baxımından əhəmiyyətini vurğulayıblar.
Mənbə: az.trend.az