Fransanın Sen-Maritim departamentində sentyabrın 11-də Ruen–Kan marşrutu üzrə hərəkət edən sərnişin qatarı relsdən çıxıb. Hadisə Kleon və Turvil-la-Rivyer kommunaları yaxınlığında qeydə alınıb.
Qatarda 186 sərnişin olub. Ruen prokurorluğunun məlumatına görə, 18 yaşlı qadın ağır vəziyyətdə xəstəxanaya çatdırılıb, əlavə 43 nəfərə təxirəsalınmaz tibbi yardım göstərilib; digər 142 sərnişin hadisənin iştirakçısı kimi qeyd edilib və Kleon meri tərəfindən ayrılmış zala yerləşdiriliblər.
Sen-Maritim prefektinin bildirdiyinə görə, hadisə yerinə 130 yanğınsöndürən və 80 texnika cəlb edilib; SAMU-nın dörd tibbi briqadası da zərərçəkənlərə yardım göstərib və departament üzrə əməliyyat mərkəzi işə salınıb.
Səlahiyyətlilər əhalidən hadisə zonasına getməməyi xahiş edib, xilasetmə işləri üçün elektrik enerjisi dayandırılıb və xətt üzrə hərəkət müvəqqəti saxlanılıb. Nəqliyyat naziri bildirib ki, prefekt hadisə yerində xilasetmə xidmətlərinin və Fransa Milli Dəmir Yolları Şirkətinin əməkdaşlarının fəaliyyətini koordinasiya edir.
Fransa Milli Dəmir Yolları Şirkəti və polis qəzanın səbəblərini araşdırır; Ruen prokurorluğu ağır xəsarətlərin səbəblərinin müəyyənləşdirilməsi ilə bağlı istintaq başladıldığını bəyan edib. Qatarın maşinisti üzərində aparılan testlərin nəticələri mənfi olub.
Qəza Ruen–Kan və Kan–Le Havr marşrutlarında hər iki istiqamətdə nəqliyyat problemlərinə səbəb olub; Fransa Milli Dəmir Yolları Şirkəti sərnişinlər üçün alternativ avtobus xidməti təşkil edəcək.
Mənbə: az.trend.az