Bakı. Trend:
Məni əfv etdiyinə görə Azərbaycan dövlətinə təşəkkür edirəm.
Bunu Trend-ə açıqlamasında Əfv Sərəncamına əsasən 16 saylı
cəzaçəkmə müəssisəsindən azadlığa buraxılan Əfqanıstan vətəndaşı
Həbibi Mutyullah deyib.
Onun sözlərinə görə, Azərbaycan sərhəddini qanunsuz pozduğuna
görə həbs olunub. Bir il yarım həbsdə qalıb və əfv olunub.
Qeyd edək ki, Prezident İlham Əliyev mayın 25-də “Məhkum edilmiş
bir sıra şəxslərin əfv olunması haqqında” sərəncam imzalayıb.
Sərəncama əsasən, ümumilikdə 154 nəfər əfv edilib. Azadlıqdan
məhrumetmə cəzasına məhkum olunmuş 63 nəfər cəzasının çəkilməmiş
hissəsindən azad edilib, 52 nəfərin cəzasının çəkilməmiş hissəsi
yarıyadək azaldılıb.
Azadlıqdan məhrumetmə cəzasına məhkum edilmiş və cəzasının
çəkilməsi təxirə salınmış 1 nəfər cəzadan azad edilib.
Həmçinin azadlığın məhdudlaşdırılması cəzasına məhkum edilmiş 28
nəfər cəzalarının çəkilməmiş hissəsindən azad olunublar.
Azadlığın məhdudlaşdırılması cəzasına məhkum edilmiş 3 şəxsin
cəzasının çəkilməmiş hissəsi yarıyadək azaldılıb.
Eləcə də islah işləri cəzasına məhkum edilmiş 2 nəfər cəzanın
çəkilməmiş hissəsindən, cərimə cəzasına məhkum edilib, 4 nəfər isə
cəzadan azad edilib.
Həmçinin azadlıqdan məhrumetmə cəzasına məhkum edilmiş və
cəzasını çəkmiş 1 şəxsin məhkumluğu götürülüb.
Eləcə də sərəncamın şamil olunduğu məhkumlardan 8 əcnəbi
vətəndaş əfv edilib. Əfv edilənlərdən 5-i Əfqanıstan, 2-i Türkiyə,
1-i isə Rusiya vətəndaşıdır.
