Bakı. Trend:
“Bir millət, iki dövlət” ruhuna sahib olduğumuz Azərbaycanın 28
May – Müstəqillik Gününü təbrik edir, bütün azərbaycanlı
qardaşlarımızın haqlı qürur və sevincini ürəkdən bölüşürəm”.
Trend xəbər verir ki, bu ifadələr Türkiyə Prezidenti Rəcəb
Tayyib Ərdoğanın rəsmi “X” hesabında təbrik mesajında yer alıb.
Türkiyə Prezidenti mesajında “Müstəqillik uğrunda şəhid olan
qəhrəmanlarımızı hörmət və rəhmətlə yad edirəm”, – deyə
bildirib.
Qeyd edək ki, bu gün Azərbaycanda 28 May – Müstəqillik Günü qeyd
edilir.
1917-ci ildə Rusiyada baş vermiş inqilab nəticəsində Romanovlar
sülaləsinə son qoyuldu. Nəticədə Rus İmperiyası dağıldı. Xalqlar öz
müqəddəratlarını özləri həll etməli oldular. Bu imkandan istifadə
edərək 1918-ci il mayın 28-də Azərbaycanın milli qayəli, milli
təfəkkürlü övladları Azərbaycan Xalq Cümhuriyyətini elan
etdilər.
Azərbaycan Xalq Cümhuriyyəti təkcə Azərbaycanda deyil, bütün
Şərqdə ilk demokratik respublika idi. Bu, respublika parlamentli
dövlət idi. Onun dövlət atributları – bayrağı, himni, gerbi qəbul
edildi. Üçrəngli bayraqda türkçülük, islamçılıq və avropalaşmaq bir
vəhdətdə idi. Ancaq Azərbaycan Xalq Cümhuriyyəti cəmi 23 ay yaşaya
bildi. 1920-ci il aprelin 28-də bolşeviklərin 11-ci ordusu
Azərbaycanı işğal etdi və respublika süquta uğradı.
